Erro

Hai quen pensa que non estou nas miñas plenas capacidades mentais,

que só son unha meniña estúpida con soños imposíbeis,

que nunca serei nada do que ansío,

que xamais obterei aquilo que quero,

polo que loito,

que acabarei por ser unha conformista máis.

Hai quen opina que o mundo non cambia,

que só se move moi lentamente,

que eu son unha ambiciosa,

parva por crer nalgo que, como din, xamais ocorrerá,

por defender ante todo os meus ideais,

por estar preparada para morrer nesta loita no camiño do que persigo.

Hai quen cre firmemente que estou errada,

que todos os meus pensamentos o están,

que non vexo as cousas como son,

imaxinándome deste xeito feitos imposíbeis,

que non existen.

Hai quen di que eu son un erro da sociedade,

pero o que non saben é que me gusta ser ese erro.