Soño

Esta noite soñei contigo.

Soñei que te bicaba,

que ti me bicabas nos beizos,

soñei que tocaba a túa pel espida,

deliciosa contra a miña,

suave lanuxe que te recubría.

Soñei cos teus ollos, escuros, castaños,

que me observaban cun deleite asombrado,

cun pracer exquisito de sentimentos encontrados.

Soñei coa túa voz repetindo o meu nome,

era tan doce,

só quería finar nese goce,

de achegarme máis e máis ata notar o roce

desa melodía que fai que chore.

Soñei que me apertabas contra o teu peito fino,

que me bicabas nos meus rizos

á vez que eu esbozaba un sorriso,

feliz pero tímido.

Soñei que me amabas,

soñei que mo contabas,

que esa frase se escapaba.

Soñei que era mentira,

realmente non me querías;

esas palabras resultaron silvas

que me producían feridas.

Soñeino e crin soñalo,

mais ao espertar chorando

decateime de que non fora soñado.